اسلام آباد () پاکستان کے ڈیجیٹل انفراسٹرکچر کو فروغ دینے کی جانب ایک بڑی پیش رفت کے طور پر، ماسٹر گروپ آف انڈسٹریز کے ذیلی ادارے “انڈس کلاؤڈ” نے عالمی ٹیکنالوجی کمپنی “ہواوے” کے ساتھ اسٹریٹجک شراکت داری قائم کر لی ہے تاکہ ملک میں ایک جدید ترین نیکسٹ-جنریشن کلاؤڈ ڈیٹا سینٹر قائم کیا جا سکے۔
گوادر پرو کے مطابق یہ شراکت داری پاکستان بھر میں کاروباری اداروں اور سرکاری شعبے کی بڑھتی ہوئی ڈیجیٹل ضروریات کو مدنظر رکھتے ہوئے محفوظ، وسعت پذیر اور توانائی بچانے والی کلاؤڈ سروسز فراہم کرے گی۔ گوادر پرو کے مطابق نیا ڈیٹا سینٹر ہواوے کی جدید ترین ٹیکنالوجیز سے لیس ہوگا، جن میں “پاور پاڈ 3.0 سسٹم” بھی شامل ہے، جو روایتی ماڈلز کے مقابلے میں 40 فیصد کم جگہ اور 70 فیصد کم توانائی استعمال کرتا ہے۔
اس کے علاوہ، “سنگھے انٹیلیجنٹ الٹرا ریزیلیئنٹ ڈیٹا سینٹر نیٹ ورک” کو بھی استعمال کیا جائے گا، جو نیٹ ورک کی طویل المدتی استحکام اور بلاتعطل سروسز کی ضمانت دے گا۔ گوادر پرو کے مطابق یہ منصوبہ پاکستان کے قومی وژن تیز رفتار ڈیجیٹل تبدیلی اور مصنوعی ذہانت، بگ ڈیٹا اور انٹرنیٹ آف تھنگز جیسی ابھرتی ہوئی ٹیکنالوجیز کے نفاذ کے حصول کی جانب اہم قدم ہے۔
گوادر پرو کے مطابق ہواوے کے عالمی آئی سی ٹی تجربے اور انڈس کلاؤڈ کی مقامی موجودگی کو بروئے کار لاتے ہوئے یہ شراکت داری ایک مضبوط اور مستقبل کے تقاضوں سے ہم آہنگ کلاؤڈ ایکو سسٹم قائم کرنے کی کوشش ہے، جو “ڈیجیٹل پاکستان” اقدام کے اہداف سے ہم آہنگ ہے اور ملک بھر میں تکنیکی جدت کو فروغ دے گا۔
