جھمپیر: پاکستان پاورٹی ایلیوی ایشن فنڈ (پی پی اے ایف) اور چائنا تھری گورجز ساؤتھ ایشیا انویسٹمنٹ لمیٹڈ (سی ایس اے آئی ایل) کے درمیان سندھ کے ضلع ٹھٹھہ کے علاقے جھمپیر میں واقع گورنمنٹ پرائمری اسکول داد بکس چانگ کی تزئین و بحالی کے لیے ایک گرانٹ معاہدے پر دستخط ہو گئے۔ یہ منصوبہ ٹی جی ڈبلیو کے کارپوریٹ سوشل رسپانسبلٹی (سی ایس آر) اقدام کے تحت مکمل کیا جائے گا۔
گوادر پروکے مطابق 12 ماہ پر مشتمل اس منصوبے میں نئے کلاس رومز اور بیت الخلا کی تعمیر، باؤنڈری وال کی تعمیر، شجرکاری، ریورس اوسموسس (RO) واٹر فلٹریشن سسٹم کی تنصیب، اساتذہ کی بھرتی، اور کمیونٹی موبلائزیشن اور داخلہ مہمات کا نفاذ شامل ہے۔
دستخطی تقریب سے خطاب کرتے ہوئے پی پی اے ایف کے چیف ایگزیکٹو آفیسر نادر گل بارکچ نے کہا کہ یہ معاہدہ دونوں اداروں کے درمیان ایک بامعنی شراکت داری کو باقاعدہ شکل دیتا ہے، جو پائیدار ترقی، کمیونٹی کی فلاح و بہبود اور جامع ترقی کے لیے مشترکہ عزم کی عکاسی کرتا ہے
انہوں نے کہا کہ چینی سرمایہ کار کمپنی کی پاکستان میں سرگرمیاں قابلِ تجدید توانائی کی پیداوار تک محدود نہیں بلکہ ذمہ دار کارپوریٹ شہریت تک پھیلی ہوئی ہیں۔ تعلیمی انفراسٹرکچر کی معاونت ایک اسٹریٹجک سی ایس آر ترجیح ہے کیونکہ یہ انسانی وسائل کی ترقی اور نسل در نسل پیش رفت کی بنیاد رکھتی ہے
گوادر پروکے مطابق اس اقدام کی اہمیت پر روشنی ڈالتے ہوئے سی ای او نے کہا کہ اسکول کی بحالی ایک دور دراز اور نظر انداز کیے گئے علاقے میں تعلیمی ڈھانچے کے ایک اہم خلا کو پُر کرے گی۔ انہوں نے مزید کہا کہ محفوظ، فعال اور بچوں کے لیے سازگار تعلیمی ماحول اسکول سے باہر بچوں کو دوبارہ کلاس رومز میں لانے کے لیے نہایت ضروری ہے، خاص طور پر دیہی علاقوں میں یہ اقدام نہ صرف مقامی بچوں کو براہِ راست فائدہ پہنچائے گا بلکہ کمیونٹی کی شمولیت اور اعتماد کو بھی مضبوط بنائے گا
